1966թ. Հրազդան քաղաքում հիմնադրվեց Հրազդանի ինդուստրիալ-տեխնոլոգիական տեխնիկումը, որը շատ կարճ ժամանակում դարձավ տարածաշրջանի լավագույն ուսումնական օջախներից մեկը: Գործունեության շուրջ 43 տարիների ընթացքում տեխնիկումը տարբեր մասնագիտությամբ կադրեր է պատրաստել, որոնք աշխատում են հանրապետության տնտեսության տարբեր ոլորտներում: 2003թ. Հրազդանի ինդուստրիալ-տեխնոլոգիական տեխնիկումի բազայի վրա հիմնվեց Հրազդանի պետական քոլեջ:
       Հայաստանի Հանրապետության կրթության և գիտության նախարարության ենթակայության տակ գործող Հրազդանի Պետական Քոլեջը միջին մասնագիտական ուսումնական հաստատություն է, որն ունի 40 տարվա կենսագրություն: Իր գոյության տարիներին քոլեջը բազմապիսի մասնագիտություններով բազմաթիվ կադրեր է նախապատրաստել, որոնք աշխատել և աշխատում են տարածաշրջանի մի շարք հիմնարկ ձեռնարկություններում:
       Քոլեջը գտնվում է Կոտայքի մարզկենտրոնում և հասանելի է քաղաքի և տարածաշրջանի բնակչության հիմնական մասին, քանի որ մարզկենտրոնի հետ տարածաշրջանի բոլոր բնակավայրերի կապը իրականացվում է երթուղային տաքսիներով, երկաթուղով և ավտոբուսներով` սիստեմատիկ ձևով, կանոնակարգված ժամանակացույցով, ամբողջ օրվա ընթացքում:

       Քոլեջում կան ուսանողներ նաև Գեղարքունիքի մարզի մի շարք բնակավայրերից, որոնց հետ կապը նույնպես իրականացվում է երթուղային տաքսիներով: Բացի դրանից գործում է 4 ուսանողական ավտոբուս, որոնք առավոտյան դասի են բերում և դասերից հետո տուն են հասցնում ուսանողներին:

       Նախկինում և ներկա պահին քոլեջի կառավարումը իրականացվում է կառուցվածքային հետևյալ կարգով.

• Տնօրեն
• Տնօրինական խորհուրդ - /9 անդամ/
• Մանկավարժական խորհուրդ - /ընդգրկված են տնօրենը, փոխտնօրենը և բոլոր դասախոսները/
• Ուսումնա-մեթոդական խորհուրդ – 5 հանձնաժողովներով
• Դասղեկական խորհուրդ - /ընդգրկված են բոլոր դասախոսները/
• Ուսանողական խորհուրդ - /9 անդամ/

       Սակայն կառավարման նշված ձևը միտված է միայն ուսումնա-դաստիարակչական վերահսկումը իրականացնելու համար, իսկ քոլեջի ընդհանուր կառավարումը իր մեջ ներառում է նաև այլ ոլորտներ: Դրանք են. ֆինանսական, տնտեսական և կոլեկտիվի կառավարում:

       Քոլեջի դասավանդողները հիմնական հաստիքային աշխատողներ են և անցել են որոշակի վերապատրաստում ուսուցման ակտիվ մեթոդների գծով: Մասնագիտական առարկաների դասավանդողներն ունեն գործնական աշխատանքի զգալի փորձ: Քոլեջն ունի որոշակի քանակի նոր տեխնիկական միջոցներ: 2007 ուսումնական տարում ստեղծվել է ջեռուցման նոր ցանց: Շենքում իրականացվում է հիմնանորոգման աշխատանքներ, որը նախատեսվում է ավարտին հասցնել 2008 թվականի ընթացքում:

Քոլեջի առօրյան
       Քոլեջի առօրյան հագեցած է բազմաթիվ ավանդույթներով. ամենամյա երկրագիտական արշավներ, հեղինակային երեկոներ, հանդիպումներ, դիմակահանդեսներ, ցուցահանդեսներ, բարեգործական ակցիաներ, տոներին նվիրված ցերեկույթներ, ինտելեկտուալ մրցույթներ, սպորտային միջոցառումներ և այլն:

Իրականացված բարեփոխումները
       Քոլեջը 2008թ. դարձել է Կոտայքի մարզի տարածաշրջանային բազմագործառութային ուսումնական կենտրոն` ընդգրկվելով պետական աջակցության ծրագրում: Այդ ծրագրի շրջանակներում իրականացվել են խոշոր ծավալների վերանորոգման աշխատանքներ: Քոլեջի կաբինետ-լաբորատորիաները համալրվել են նոր ուսումնական գույքով, համակարգիչներով, տեսա և ձայնասարքավորումներով, ինտերակտիվ լսարանով, սպորտային գույքով ու վարժասարքերով, խոհանոցային սարքավորումներով: Այդ գործընթացին մասնակցել են նաև ՄԱԿ-ի հայաստանյան գրասենյակը և Բրիտանական խորհուրդը: Քոլեջի վարչական և մանկավարժական անձնակազմը պարբերաբար մասնակցում է վերապատրաստման տարբեր դասընթացների: Այս ամենը նպաստում է կրթության որակի և շրջանավարտների մրցունակության բարձրացմանն աշխատաշուկայում: